Núcleo de Carril (VIlagarcía de Arousa)

O ámbito da área de rehabilitación conta cunha superficie aproximada de 8,48 hectáreas. O núcleo de Carril ten o seu barrio orixinario vinculado á actividade pesqueira apoiándose as primeiras edificacións nas marxes das primeiras vías de comunicación que actuaban como eixes de unión entre os núcleos de poboación para o tránsito de mercadorías. O tecido orixinario pode lerse como un conxunto unitario pola súa morfoloxía practicamente uniforme e unha arquitectura popular de balcóns, galerías, corredores e “patíns” que conforman un espazo de gran valor arquitectónico e ambiental. Esta área foi declarada o 02 de marzo 2007 e nela sitúanse 507 vivendas susceptibles de rehabilitación, destinadas a uso residencial.